究竟係唔係豬x感? 無人肯正面地老實認.

算佢扲得快, 唔再收新人. 講真, 新 case 唔算多, 幾日浸吓一個, 浸吓又一個… 但掛上 outbreak 的標籤, 平常要外勤的員工變得到處都唔受歡迎. 官腔話就話只係 A 型流感唔係豬x感, 叫員工上網找資料自保. 網上資料好明顯話豬x感 =A 型流感 = h1n1. 返工再問, 究竟係唔係 h1n1, 仲死口唔認… 一味搞氣氛充撐場面. 禮拜一請食雪糕禮拜二食 taco 禮拜三燒烤… 不過有得食就好! 呢方面好感恩.

最慘都係病人, 所有群體活動, 包括聚埋响飯堂食果三餐都要閉門自理. 日日困係一個床位多少少的地方, 悶到發哂脾氣對我喊生喊死... 講解左比佢聽, 唔隔二十分鐘又唔記得, 又喊過! 又要再 tum 過! 可能, 依家就係比我充份顯示我天使潛質既時候喇!! 日日 therapy 都不外乎開解再開解…唔記得又再開解… 當佢記得點解, 唔使再開解果陣, 就叫「有進步」了!

與其唔清楚以為可以為民定驚, 不如老實講明, 見招拆招是否更明智? 一陣又要員工食預防劑, 一陣又要未打感冒針的去打針. 講明是 new strain, 打一堆舊菌入去又有咩作用? 分明要谷員工啲白血球出來打仗. 醫院入面周圍成日都大把菌, 有必要再谷咩? 講真我唔介意隻菌叫咩名, 但一日唔認, 一日大家都留有餘地, 唔做好防備工夫, 唔正視問題.

仲有唔明: 點解病人要互相隔離, 員工就可以一齊食雪糕食 taco 同燒烤呢? 員工至係最高危, 又可以帶菌又睇唔出有問題. 照顧完一個到第個, 放工仲會見其他人…. 要靠佢傳開都咪話無可能. 怕就最怕員工唔夠專業… 希望個個都認真洗手同不斷換面啦. 唔係我連屋企都唔敢返!

Hmm… 睇 blog 的朋友們, 問你驚唔驚?!

唔好生人唔生胆喎! 我 handle 每個病人前後都洗手換面架! 唔好比個豬字嚇親, 官方就因為咁, 先要死口唔認之麻! 咁易死, 就無人住老人院啦. 係時候死就係時候死, 未係時候就點都唔死. 怕生病, 咪操 fit 啲, 食健康啲囉! 最緊要心理上相信自己身體無咁易被打敗, 但亦唔好忽視防備工作的重要性. 正常人要間中病少少, 個免疫系統先會操作正常. 所以, 完全唔病亦不見得係好事.

要小心, 更要有信心.